Државната изборна комисија (ДИК) информира дека согласно Роковникот за локалните избори 2025, е во тек постапката за поднесување барања за акредитација за набљудување и известување од изборите закажани за 19 октомври. Досега, за следење на изборниот процес е акредитиран само Младинскиот културен центар Битола.

Рокот за поднесување барања трае до 8 октомври во полноќ. Право на поднесување имаат домашни здруженија и странски организации регистрирани најмалку една година пред изборите, во чиј статут е предвидена заштитата на човековите права, меѓународни организации, странски дипломатски претставништва, како и домашни и странски медиуми.

Барањата за акредитација, со потребната документација, се доставуваат на електронската адреса [email protected]. ДИК ќе издаде овластувања на сите пријавени кои ги исполнуваат условите најдоцна седум дена по приемот на барањето.