Во САД отворена истрага против ФИФА: сомнежи за мито од над 200 милиони долари
Конгресменот Џејми Раскин отворил истрага против ФИФА. Се испитуваат потенцијално нелегални врски и активности помеѓу врхушката на ФИФА и администрацијата на Трамп. Истраги на Министерството за правда откриле мито и провизии во вредност од над 200 милиони долари во кои биле вклучени обвинети од повеќе од 20 земји
Џејми Раскин, конгресмен од Демократската партија, изјави дека отворил истрага против ФИФА, наведувајќи потенцијална корупција што ги вклучува фудбалската организација и администрацијата на Трамп, пренесоа светските медиуми.
Препорачано
Во писмо до претседателот на ФИФА, Џани Инфантино, Раскин, висок член во Комитетот за правосудство на Претставничкиот дом, рече дека ќе се истражува кампања водена од ФИФА за добивање поволен третман од американскиот претседател Доналд Трамп, вклучително и отфрлање на високопрофилни случаи на корупција во САД во врска со глобалното управно тело на фудбалот.
Раскин тврди дека ФИФА го искористила својот однос со администрацијата на Трамп за да се вклучи во „нелегално зголемување на цените и измамнички тактики на продажба“ за билети за Светското првенство.
Блиски врски со Трамп
Според Раскин, истрагата ќе го испита управувањето со ФИФА под Инфантино, вклучително и обвинувањата дека организацијата ги ослабела внатрешните етички заштитни мерки, додека се обидувала да негува блиски врски со Трамп.
Конгресменот, исто така, ја обвини администрацијата на Трамп дека се откажала од спроведувањето на антикорупциските мерки во врска со ФИФА, откако претходните истраги на Министерството за правда открија долготрајна меѓународна шема за поткуп поврзана со правата за медиуми.
Раскин рече дека претходните истраги на Министерството за правда откриле мито и провизии во вредност од над 200 милиони долари во кои биле вклучени обвинети од повеќе од 20 земји. Тој тврди дека и покрај обезбедувањето пресуди во некои случаи, администрацијата на Трамп подоцна ги отфрлила гонењата, дозволувајќи им на осудените обвинети да бидат ослободени.
Ујдурми со билетите
Истрагата ќе се фокусира и на практиките на ФИФА за продажба на билети за Светското првенство, за кои Раскин рече дека вклучуваат зголемување на цените, динамично одредување цените и политики што дозволуваат манипулации со седиштата по купувањето на билетите.
Раскин бара документи поврзани со какви било подароци, плаќања или други бенефиции наводно обезбедени од ФИФА наменети за Трамп или неговите соработници, како и записи во врска со контактите на ФИФА со претставници на американската влада и нејзините практики за продажба на билети.
Сомнителни се седум натпревари на Мундијалот, ФИФА вели дека немало нерегуларности
Следното Светско првенство можеби ќе се гледа на „Нетфликс“ и на „Јутјуб“
