Пријателка и колешка на Гоце Тодоровски сподели моменти од последните месеци од неговиот живот. Во емотивната објава на Фејсбук, актерката Весна Димитрова-Бобевски сподели за последното заедничко дружење со легендарниот актер кој почина вчера по кусо боледување на 75 години.

Заминувањето на македонскиот актер Гоце Тодоровски ја потресе јавноста, а од него со емотивни зборови се простуваат колеги, пријатели и почитувачи кои со години ја делеа сцената со него.

Меѓу нив е и актерката Димитрова-Бобевски, која на социјалните мрежи објави трогателна порака, потсетувајќи дека пред само година и пол ја снимиле нивната последната заедничка епизода од легендарните „Македонски народни приказни“.

„Пред само година и пол, пред камера ја снимивме нашата последна приказна. Но, зад нас останаа и многу други заеднички приказни на телевизија и на театарската сцена. Чест ми беше што делев сцена со тебе и што имав можност да учам од еден голем актер и колега. Почивај во мир, драг Гоце. Ќе останеш запаметен по твоите незаборавни улоги на телевизија и во театарот. Остави неизбришлива трага во македонската актерска уметност и во срцата на публиката. Вечна ти слава“, напиша актерката.

„Го изгубивме, се предаде Гоце Тодоровски, почина. Фамилија Тодоровски ја објавува најтажната вест после голема борба … Го напушти овој свет, а ми вети … Срцето не издржа, престана да работи … Го реанимираа, направија сè, престана да диши, на кислород ставен, практично апаратурата го држеше, не издржа бе татко … Невидена желба за живот … Лесна ти земја татко мој, вечен непребол. Душата не умира, а телото е премногу истрошено, сега летај со ангелите … Уште кога си замина кумац Ванчо, замина и дел од тебе, остана без една половина. Иако пензионирани, не се помири и готово. Крај. Сега барем знам дека сте заедно, тандем на овој, па и на оној свет“, напиша неговата ќерка Сашенка Тодоровска по смртта на легендарниот актер.

И покрај силната желба за живот, неговото срце не издржа — замина Гоце Тодоровски, доајенот на македонскиот хумор