Во Реал бесни на Зидан, Евертон го направи грабежот на столетието со Хамес
Медиумите во Мадрид немаат милост за тренерот на „кралскиот“ клуб, Зинедин Зидан и неговата одлука премногу лесно да се ослободи од играчите кои сега блескаат во други екипи.
Градското Мерсисајд дерби помеѓу Евертон и Ливерпул заврши без победник, а „сините“ по пет кола се лидери на табелата без пораз.
Навивачите на Евертон не паметат кога нивниот тим имал вака добар старт, а најголеми заслуги за одличните игри покрај тренерот Карло Анчелоти има Хамес Родригез. Колумбиецот денеска асистираше при постигнувањето на првиот гол и во петте кола во Премиер лигата има четири асистенции и три гола по што пофалбите доаѓаат од сите страни.
– Хамес во Евертон игра како во репрезентацијата на Колумбија, има апсолутна слобода во играта. тоа што го игра кај Анчелоти во Евертон е негова природна позиција и така играше во Порто – изјави Карлос Кеирош, колумбискиот селектор.
И додека во Евертон го слават Хамес Родригез, во Мадрид, двата спортски весници „Марка“ и „АС“ удрија по трнеерот на кралевите, Зинедин Зидан.
„АС“ пишува дека Хамес е „грабеж на столетието“ бидејќи Евертон го „ограби“ Реал, за ситни пари го зеде Колумбиецот.
Весникот се прашува дали Зидан не можеше да го трпи Хамес Родригез па го испрати на позајмица во Баерн Минхен или едноставно не можеше да му најде соодветно место во тимот бидејќи Колумбиецот додека Анчелоти беше тренер на Реал играше фантастично.
Но, тоа не е единствен грев на Зидан, „Марка“ смета дека тренерот на Реал погреши што го пушти Регулион во Тотенхем и дека шпанскиот репрезентативец би бил подобро решение од ветеранот Марсело кого го стигнуваат годините.
Весникот смета дека Зидан се откажа од подобриот играч во овие моменти, но и од иднината бидејќи Серхио Регулион има само 23 години додека Марсело е длабоко навлезен во четвртата деценија од животот.
„Некои фудбалери играат и изгледаат многу подобро на теренот кога не ги тренира Зидан. И Бејл играше многу подобро за репрезентацијата, како и Ковачиќ во Челси, отколку кога беа во Реал. Најлошо од се ќе биде доколку Бејл блесне во Тотенхем. Тоа ќе значи дека Зидан е ограбен, а Реал многу би загубил поради лошите проценки на тренерот“, пишува весникот.