Нигериската актерка Функе Акинделе-Бело (42) е уапсена откако и покрај карантинот и забраните за собирања, таа му приредила на својот сопруг роденденска забава.

Ѕвездата од бројни филмови и нејзиниот сопруг предизвикаа бес кај јавноста, откако на Инстаграм објавија фотогтрафии и снимки од забавата.

Интересно, актерката со денови им испраќаше на своите фанови пораки дека ги почитува правилата и да не излегуваат од дома, а беше дел и од кампањата на компанијата „Dettol Nigeria“, која објаснува зошто е важно да се остане дома и да се држи дистанца.

„Не можам да верувам како луѓето можат да бидат толку лицемерни. Богатите ги учат обичните граѓани за некаков ред до кој и самите не се придржуваат“, гласат само некои од коментарите на социјалните мрежи.

„Жал ми е ако погрешно ве учев со оваа снимка, ја разбирам вашата загриженост и ќе го практикувам сето она за што зборував од претходно“, одговори актерката.

Таа додаде дека на забавата присуствувале само нејзини блиски личности од продукциската куќа.

Парот во понеделникот се појави на суд, каде се изјаснија како виновни, а се казнети со 14 дена општокорисна работа.