Иако до официјалната премиера на новиот филм на Кристофер Нолан, „Одисеја“ (The Odyssey), останува уште цел месец, остварувањето веќе ги руши сите рекорди на соборена продажба во Велика Британија. Најголемото британско кино-платно, „BFI IMAX“ во Лондон, соопшти дека во првите 24 часа од пуштањето на билетите во претпродажба биле купени дури 28.000 влезници, пренесува „Верајети“.

Со ова е поставен апсолутен рекорд со бруто заработка од 750.000 фунти, односно еден милион американски долари, за само еден ден. Колку е огромен овој успех покажува фактот што Нолан со овој резултат повеќе од двојно го надмина претходниот рекорд на „Дина: Втор дел“, а речиси четирикратно ја засенува заработката од првиот ден на неговиот претходен хит „Опенхајмер“.

Огромен бум и рекорди се забележани и во Соединетите Американски Држави, каде што премиум билетите за големи формати беа пуштени во продажба уште во 2025 година, односно една година однапред. Во почетната претпродажба во САД беа купени близу 150.000 билети, со што се остварија 3,4 милиони долари за само 24 часа, што е најдобар резултат во последните четири години.

Невидената побарувачка предизвика паѓање на веб-страниците за продажба и онлајн чекање подолго од еден час, додека на платформите како „eBay“ цените на билетите кај препродавачите достигнаа вртоглави 1.500 долари.

Овој филмски спектакл дополнително привлекува внимание бидејќи е првиот проект во историјата кој е во целост снимен со специјалните „IMAX 70 mm“ камери. Покрај техничката супериорност, „Одисеја“ содржи и неверојатна холивудска актерска постава предводена од Мет Дејмон, Зендаја, Роберт Патинсон, Том Холанд, Ен Хатавеј, Лупита Нионго и Шарлиз Терон.

Светската премиера на филмот е закажана за 17 јули оваа година, кога се очекува вистинско лудило во кината ширум светот.

Мет Дејмон морал да ослабе за улогата во „Одисеја“, еве што отстранил од исхраната