Анимираниот филм „Супер Марио Галакси“ ја надмина границата од една милијарда долари заработка во кината ширум светот, со што стана првото филмско остварување во 2026 година на кое му успеа ваков подвиг, пренесува „Дедлајн“.

Станува збор за филмска адаптација на една од најпознатите видеоигри во светот, создадена во соработка меѓу студијата „Јуниверзал пикчерс“, „Илуминација“ и јапонската компанија „Нинтендо“.

Буџетот за продукција изнесувал 110 милиони долари, што според холивудските стандарди се смета за релативно скромна сума за анимиран филм. Токму поради тоа, се очекува остварувањето да донесе исклучително голем профит за продуцентите.

Претходниот филм од франшизата, „Супер Марио брадерс – филмот“, исто така беше огромен успех на киноблагајните. По завршувањето на прикажувањето, тој оствари речиси 1,4 милијарди долари приходи од продажба на билети на глобално ниво.

Во меѓувреме, филмското студио „Јуниверзал пикчерс“ веќе подготвува неколку големи проекти. Меѓу нив се трилерот „Ден на откривањето“, новиот филм „Одисеја“, како и анимираното остварување „Минионите и чудовиштата“, кое повторно го продуцира студиото „Илуминација“.

Според досегашните податоци од светските киноблагајни, „Супер Марио Галакси“ е најгледаниот и најуспешен филм во 2026 година со заработка поголема од една милијарда долари. Зад него се наоѓаат биографскиот филм „Мајкл“, научнофантастичната драма „Проект Спасоносна Мисија“ и продолжението „Ѓаволот носи Прада 2“.