Владин „центар за одговор на сајбер инциденти“ ќе биде промовиран во првата половина од наредната година, најави вечерва министерот за дигитална трансформација Стефан Андоновски.

-Веќе завршуваме со дел од набавките и инсталирање на опремата. Првпат ќе лансираме владин центар за одговор на сајбер инциденти. Обично ставам амбициозни рокови, еве ќе речам, ќе го промовираме во првата половина од 2026 година, рече Андоновски во „Тема на денот“ на МТВ.

Тоа, како што објаснува министерот, ќе биде „мониторинг-центар за сè што се случува во смисла на сајбер сообраќајот во владините институции“.

-Ќе може рано да се интервенира доколку се случат определени напади и закани. Го дизајниравме со инфраструктура што ќе овозможи ширење, нема да биде огромен на почетокот, но полека-полека ќе го збогатуваме со дополнителни инвестиции, рече Андоновски.