Владата на Макрон со нови стимулации за зелените технологии
Француската влада ќе понуди нови даночни олеснувања и стимулации за инвестиции во ветерна и соларна енергија, топлински пумпи и батерии како дел од транзицијата на индустријата кон зелена иднина, објави претседателот Емануел Макрон, цитиран од Ројтерс.
Мерките, кои ќе бидат вклучени во буџетот за следната година, се очекува да генерираат 20 милијарди евра приватни инвестиции до 2030 година и да отворат десетици илјади нови работни места.
Француската влада се обидува да ги зголеми инвестициите во еколошки технологии во обид да ги достигне САД, кои на компаниите кои инвестираат во зелени технологии им даваат длабоки попусти според таканаречениот Закон за намалување на инфлацијата.
Макрон посочи дека законот за зелена индустрија, кој ќе биде претставен следниот вторник, ќе вклучи и зголемени инвестиции во обука, како и олеснување на процедурите за отворање нови фабрики и погони во Франција. Целта е ова да се случи двојно побрзо отколку што е сега, пишува БТА.