Влада: Ослободување од царини за суровини и репроматеријали за компаниите опфатени со првата мерка од Пакетот 5
Владата соопшти дека со првата мерка од петтиот пакет компаниите од метало-преработувачката индустрија, металургијата, текстилната и кожарската индустрија се ослободени од царинските давачки во висина од 7,1 милиони евра за суровини и за репроматеријали.
Како што се наведува во денешното соопштение, на вчерашната 40-та седница, Владата донесе одлука за укинување на увозните давачки – царинските стапки, на одделни суровини и репроматеријали кои се употребуваат во преработувачката индустрија, со цел да ги олесни условите за работење на овие компании и да овозможи да се зголеми нивната конкурентност во услови на пандемија и отежнато работење на компаниите од преработувачката индустрија.
– Со одлуката за укинување на увозните давачки што ќе стапи во сила на 1 февруари, компаниите ќе бидат ослободени од царинските давачки во висина од 7,1 милиони евра за 71 одделни суровини и репроматеријали кои се употребуваат во метало-преработувачката индустрија, се наведува во соопштението од Владата.
Предлог листите на производи опфатени со оваа одлука, која е првата усвоена одлука од новиот, петти, пакет на економски мерки за справување со последиците од ковид-19, се изготвени по извршена консултација со компаниите членки на Стопанската комора од секторите на метало-преработувачката индустрија, на металургијата, на текстилната и на кожарската индустрија, кои за увоз на суровини и репроматеријали во 2019 година платиле вкупно 162,4 милиони евра.