Сокриен зад убавата Јабланица, со спокоен живот во с.Октиси, тој ја покажува својата дарба само еднаш во годината преку фасцинантнита изработка на маски по повод Василица. Затворен зад магацинските врати на една струшка компанија со неговата извонредна краетивност, 26-годишниот Ненад Влаќески не е уметник по вокација, но има талент да создава вонсерсиски изработки на симболични креации.

Го запознавме лани на Вевчанскиот карневал, кога како со магнет нè привлече со групната маска „Чудовишта од подземјето“, детално изделкан лик со екпресија на лицето, прецизно извајана целокупа слика на праисториски суштества со сегменти навидум неспоиви, а во целокупна хармонија. Оваа година се сретнавме пак, веднаш препознав дека зад совршената креација се крие тој.

Овојпат во облик на „Чудни морнари“, почудни и не можат да бидат. Лик со реалистични црти кој не ве остава рамнодушни, маска чиниш ќе ти проговори на некој древен далечен јазик.

– Мојата пасија за маските доаѓа природно од поднебјето во коешто живеам. Од дете секогаш маскирани за Василица прво во нашето село, а потоа одевме во Вевчани. Моите родители ми ја всадиле љубовта кон оваа традиција. Во последните неколку години маските ги подготвувам долго, со месеци, сакам да бидеме поинакви, уникатни, да останеме запаметени – вели Влаќески.

Од 2019 година тој ги изработува маските сам, ги длаби, ги сече, ги резба, ги лепи… Вели дека купува издржливи материјали од кои го создава тоа што го замислил, надополнува со материјали од природата за да се добие совршената слика.

Влаќески досега не изработил маска со политичка конотација, но не ја исклучува и таа можност за во иднина.

– Има денови кога не спијам и постојано размислувам за деловите како ќе изгледа маската. Не можам да го опишам тоа чувство. Јас не ги гледам идеите од никаде, не ја добивам инспирацијата од некоја апликација, едноставно постои само во мојата имагинација – рече нашиот соговорник.

Погледнете го целиот разговор на јутјуб-каналот на „Слободен печат“.