Има ли Македонија креативци? Што креираат и по што се издвојуваат? „Слободен печат“ ќе се обиде преку серијал да обезбеди барем мал дел од одговорите и да им даде шанса на креативците да ѝ ги претстават своите дела и идеи на пошироката јавност.

Во овој серијал ви го претставуваме Ристо Костовски – стар скопјанец и фотограф, кој по долгогодишната кариера како телекомуникациски инженер, ја започнува својата „опсесија“ со фотографијата.

Костовски ја започнaл својата фотографска патека со купувањето на првата камера, што е само почеток на неговото патешествие. По 30 години работа како телекомуникациски инженер тој наоѓа утеха во џез-музиката и фотографијата, заменувајќи го хобито електроника со фотоапарат, која станува главна инспирација на неговото патување.

„Бегав од реалноста“, вели тој, опишувајќи како фотографијата му помогнала да го доживее светот поинаку.

Спомените од летата во Дојран, во нивната скромна куќичка каде што со родителите го поминувал времето, дополнително го инспирирале во создавањето на фотографии.

„Убавината на езерото, мирисот на водата и трпението што го изградив со рибарењето, ми беа силна инспирација за да почнам со еден вид фотографска медитација“ – раскажува Костовски за „Слободен печат“.

 

Неговата опсесија за фотографија продолжува и по пензионирањето. Најчесто можеме да го сретнеме во Старата скопска чаршија, фотографирајќи, шетајќи по улиците на градот, документирајќи ги своите гледишта на општеството, промените, и да ни го прикаже градот во една поразлична слика.

„Камерата стана мојот тефтер“, додава тој.

Во текот на својата кариера, Ристо организирал четири самостојни изложби. Првата, насловена „Урбани рефлексии“, се однесува на времето и реалноста во Скопје. Следува втора изложба во КСП Центар-Јадро, со истите фотографии. Неговата трета изложба, „Попатни одблесоци“, и четвртата, „Поинаку“, се одржуваат во Музејот на Македонија.