Роботската хирургија, која до неодамна изгледаше како научна фантастика, веќе станува реалност и во Македонија. Во приватната болница „Аџибадем Систина“ веќе функционира робот што е произведен од една од водечките кинески компании во светот во оваа област. За самата операција, за нејзиниот тек, за безбедноста на пациентот, но и за тимот кој стои позади секоја операција, зборуваме со доктор Бобан Сарџовски, гинеколог-акушер од „Аџибадем Систина“. Докторот вели дека роботската хирургија е значаен чекор во современата гинекологија. Но појаснува дека пациентите треба да знаат дека роботот не оперира сам.

– Операцијата ја води хирургот, кој го контролира роботот во текот на целата интервенција. Она што роботот ни го овозможува е поголема прецизност, зголемена слобода во манипулацијата и видливост што не може да се постигне со класичните техники, како отворена хирургија или лапароскопија. Имаме 3Д-визија, зголемување до 10 пати и слобода во движењата, што ни дозволува да оперираме и во делови кои изгледаат недостапни – објаснува д-р Сарџовски.

Тој вели дека класичната отворена хирургија (лапаротомија) не нуди толку добро видно поле како роботската хирургија. Лапароскопијата, пак, овозможува зголемување, но е ограничена во одредени движења што ги прави човечката рака. Роботската технологија ги комбинира предностите на двете методи – нудејќи прецизност, видливост и маневрирање што ја прават операцијата поефикасна и поелегантна.

-Ова не е играчка, иако така изгледа. Роботот е екстремно скапа алатка и мора да се користи правилно, бидејќи неконтролирана употреба може да предизвика сериозни проблеми. Се применува во различни области на хирургијата, но секогаш кај строго селектирани случаи и со јасна индикација – додава Сарџовски.

Роботската хирургија најчесто се користи во урологијата, гинекологијата, абдоминалната и детската хирургија, но нејзиниот потенцијал се проширува и во васкуларната, спиналната хирургија и ортопедијата. Со овој метод може да се решаваат и посложени случаи, но секогаш по внимателна проценка.

-Не е оправдано да се користи робот за мала циста која може да се реши лапароскопски за 20 минути. Роботската хирургија е наменета за случаи каде што навистина носи бенефит за пациентот – побрза рехабилитација, помала крвозагуба и подобра видливост за хирургот – нагласува тој.

Системот се состои од два дела: оперативен дел со четири роботски раце поставени над пациентот и конзола од која хирургот ги контролира инструментите. За време на интервенцијата, хирургот седи на конзолата и ги управува сите движења, додека асистент и цел тим во операционата сала се грижат за текот на постапката.

Докторот вели дека и покрај напредната технологија, одговорноста останува кај хирургот. Во секој момент постои можност, доколку е потребно, интервенцијата да се продолжи со класична хирургија.
Вели дека во гинекологијата, роботската хирургија се применува за третман на цисти, миоми, хистеректомии, ендометриоза, како и одредени гинеколошки карциноми. Секој случај се разгледува индивидуално, а одлуките често се носат и конзилијарно, со вклучување на повеќе специјалисти.

Предностите на роботската хирургија вклучуваат прецизна визуелизација, поголема слобода на движење, помала загуба на крв и побрзо закрепнување на пациентите. Од друга страна, остануваат предизвиците како што се високата цена, времето за подготовка и отсуството на директен тактилен осет.

-Навлегувањето на роботската хирургија во современата медицина е голем чекор за Македонија. Таа овозможува минимално инвазивни интервенции и намален ризик за пациентите. Сепак, конечниот збор секогаш го има хирургот, кој ја носи целосната одговорност – заклучува д-р Сарџовски.

Со оваа технологија, Македонија се приклучува на глобалните трендови во медицината, каде роботите стануваат моќна алатка, но човечката експертиза останува клучна.