„Брзите кредити“ нудат лесен и брз пристап до пари во итни ситуации. Сепак, трошокот е значително повисок од која било друга форма на позајмување пари – брзите кредити имаат екстремно високи каматни стапки и дополнителни трошоци.

Ги прашавме граѓаните дали некогаш зеле брз кредит, какво било нивното искуство и дали познаваат некој близок што користел ваков вид финансиска услуга, како и дали сметаат дека каматите се превисоки.

Мислењата на граѓаните главно се негативни. Повеќето од анкетираните велат дека никогаш не зеле брз кредит.

„Никогаш досега во животот, а и не би зела“, вели една госпоѓа.

„Знам што е, но никогаш не би зел затоа што е измама“, додава друг господин.

Еден господин додаде дека при земање кредит, често има скриени трошоци и високи камати:

„Ќе земеш четири илјади, а има скриени трошоци со ситни букви. Каматите одат и до 40 проценти, а не од 3 до 5.“

Друг анкетиран смета дека е потребна државна регулација:

„Државата треба да го регулира тоа, каматите се многу високи. Населението има потреба, но мора да има контрола.“

„Тоа е лихварско задолжување. Лесно може да се заглави“, додаде една госпоѓа.

„Ќерка ми зеде брз кредит – каматите се големи“, вели еден родител.

Со скепса, дел од граѓаните заклучуваат: „Сè што е брзо – кратко трае. Тоа не е долгорочно решение.“

Други велат дека немаат конкретни искуства:

„Никој не ми се пожалил, ниту позитивно ниту негативно.“