Еден од десетте најбарани бегалци на ФБИ, кој е обвинет за убиство на млада жена во САД во 2016 година, е уапсен од мексиканската војска и полиција, објавија властите во двете земји во саботата, пренесува Ел Миленио.

Според веб-страницата на ФБИ, која го потврди неговото апсење, станува збор за Алехандро Росалес Кастиљо (27), американски државјанин, кој е обвинет за убиство на Чук Куан „Сенди“ Ли Лаја, млада Американка од виетнамско потекло, со која работел некое време во ресторан во Шарлот, во сојузната држава Северна Каролина.

ФБИ понуди награда од 250.000 долари за каква било информација што би можела да доведе до негово апсење.
Младиот човек, кој имал „црвена потерница“ од Интерпол и „налог за апсење за екстрадиција“, е обвинет за „убиство од прв степен, вооружен грабеж, кражба на автомобил и киднапирање“, објасни мексиканскиот министер за безбедност Омар Гарсија Харфус преку „Икс“.

Американскиот амбасадор во Мексико, Роналд Џонсон, преку „Икс“ го пофали апсењето, за кое рече дека „ги одразува резултатите од заедничките напори“ на владите на двете земји.

По апсењето во државата Идалго, Алехандро Росалес Кастиљо беше изведен пред обвинителството.

Според извештаите на американските медиуми, мажот имал кратка врска со жртвата, 23, и позајмил пари од младата жена.

Тој ѝ закажал состанок, наводно за да го отплати долгот – но наместо тоа, ја киднапирал, ја принудил да подигне пари од банкомат и да му ги даде заштедите, потоа ја однел во шумска област, ја застрелал во главата и го фрлил нејзиното тело во клисура.