ВИДЕО | „Во Америка бев осамена“: Илина Арсова со емотивна исповед за враќањето дома
Алпинистка и уметница, Илина Арсова ја откри вистинската причина зошто од Америка се врати во Македонија и зборуваше за својата осаменост.
Препорачано
Арсова гостуваше во поткастот „Смисла“, каде ја спореди физичката самотија и емоционалната осаменост. Иако нејзините подвизи често ја водат во сурови и изолирани предели, таа рече дека вистинската осаменост не се мери со бројот на луѓе околу нас.
„Голема е разликата од тоа да се биде осамен и да се биде сам,“ вели Арсова.
Таа објаснува дека на планина, иако физички е сама, никогаш не го чувствува товарот на осаменоста. Наспроти тоа, таа се присетува на моменти поминати во Америка каде, и покрај тоа што била опкружена со многу луѓе, се чувствувала изолирано бидејќи немала чувство на припадност кон таа средина.
Во моментите кога ѝ била потребна дополнителна мотивација, Илина открива дека дури и нејзиниот татко знаел да ја охрабри со зборовите: „Ајде сега замисли си дека си на планина“.
„Убаво е човек да биде сам и да молчи, да се осами, но голема е разликата од тоа да се биде осамен и да се биде сам. Јас можам да бидам сама во планина и да не се чувствувам осамено, а ми се случувало во Америка да бидам опкружена со луѓе, каде што се чувствував осамена, бидејќи не чувствував дека таму припаѓам. И дури татко ми кога сакаше да ме мотивира ќе ми каже: ‘Ајде сега замисли си дека си на планина сама’. И не беше баш лесно, ама сепак таков совет помага“, рече Арсова.
Минатата година, Илина се врати од Америка во Македонија. На Универзитетот во Тенеси, таа беше на докторски студии и работеше како професор на одделот за кинезиологија, рекреација и спорт.
„Напредувам во истражувањето што најчесто се занимава со проблемите на родова еднаквост во спортот. Како единствена Македонка која се искачила на Монт Еверест и на највисоките врвови на сите седум континенти, многупати бев дискриминирана и деградирана од власта и од институциите. Токму тоа е мојот мотив за работа и научно истражување на таа тема“, изјави планинарката за „Слободен печат“ пред две и пол години.
