ВИДЕО: Вечер на пресврти во Лигата на конференции, победи слават Базел и Вест хем
Се одиграа првите натпревари од полуфиналето во Лигата на конференции, Базел славеше на гостувањето кај Фиорентина со 1:2, а со истиот резултат Вест хем дома беше подобар од АЗ Алкмаар.
На стадионот „Артемио Франки“ во Фиренца водеа „виолетовите“ со погодокот на Кабрал во 25 минута. Швајцарците израмнија во 71 минута преку Диуф, а конечниот епилог го поставија во 93 минута кога во мрежата на Италијанците ја затресе Амдуни.
Пресврт имаше и дуелот одигран во Лондон, АЗ Алкмаар водеше со 1:0 откако радост за Холанѓаните донесе Реијндерс во 41 минута.
„Чеканите“ во вториот дел се погрижија за егал во 67 минута кога од пенал прецизен беше Бенрахма, а Антонио ја обезбеди победата (76`).
Реванш мечевите во Швајцарија и Холандија ќе се играат на 18 мај. Потсетување дека финалето во ова натпреварување ќе се игра 7 јуни во Прага, Чешка.