Никола Перевски – Пере, Дарко Гелев – Брејк и неповторливиот Игор Џамбазов, седнати во лежерна атмосфера, во еден глас ја отпеаја култната „Временска машина“ од групата „Нокаут“.

Овој спонтан настап не е само емотивно навраќање во минатото, туку и официјална потврда дека токму Брејк и Џамбазов ќе бидат дел од специјалните гости на претстојниот концерт.

Во пресрет на концертот на 9 мај, со кој групата „Нокаут“ ќе прослави 30 години постоење на сцената, беше објавено видео во кое трите македонски легенди нè потсетија зошто нивната музика е безвременска.

Овој јубилеј, кој ќе се одржи во салата „Јане Сандански“, не е само обична свирка, туку прослава на три децении македонски поп-рок звук. Брејк и Игор Џамбазов ќе бидат специјални гости, а на концертот ќе се пеат хитовите – од „Фатална опсесија“, преку емотивните балади, па сè до „Временска машина“, песна што стана симбол на една цела генерација.

Видеото кое се појави во јавноста е вистинска најава за она што „Нокаут“ го ветува – вечер исполнета со носталгија, но и со многу енергија.

„Почетоците беа убави, но и тешки, како и кај секој бенд. Имаш многу желба, многу идеи, а малку услови и тогаш сè правиш со срце. На крајот на деведесеттите популарноста беше поинаква од денес. Немаше толку социјални мрежи, па луѓето те запознаваа преку песните, настапите на таа една телевизија и контактот во живо. Тоа беше многу непосредно и многу вистинско“, рече Пере во неодамнешно интервју за „Слободен печат“.