Додека просечните Јутјуб видеа траат само неколку минути, а „долгите формати“ ретко надминуваат еден или два часа, ова видео оди во целосно друга димензија.

Интернетот повторно докажа дека за вирален хит не е потребна содржина – дури е подобро ако воопшто ја нема. Имено, социјалните мрежи и Јутјуб се во шок поради видео кое буквално не прикажува ништо. И не станува збор за метафорично „ништо“, каде некој само седи или прави некаков банален потег. Станува збор за видео кое, на прв поглед, е целосно празно: црн екран, без видливи елементи и без звук. Резултатот? Потполна конфузија кај сите кои ќе го отворат, пишува „Интернејшнал бизнис тајмс“.

Секако, Јутјуб е полн со бесмислени или празни видеа, но ова се издвојува по еден едноставен факт – бројките. Од објавувањето на 5 јануари, видеото собра околу 3,5 милиони прегледи, што е импресивно за кој било тип на содржина, а особено за видео во кое буквално ништо не се случува. Но, тоа не е ни најбизарниот дел.

Според официјалниот опис, видеото трае повеќе од 140 години. Да, добро прочитавте. Додека просечните видеа траат само неколку минути, а „долгите формати“ ретко надминуваат неколку часа, ова видеото оди во сосема друга димензија. Дури и легендарниот десетчасовен „loop“ каде Палпатин од „Star Wars“ повторува „Do it“ изгледа кратко во споредба со ова видео, кое е толку долго што никој човек не би можел да дочека крај.

Како да не е доволно чудно, видеото е објавено од профил со име „shinywr“, а насловот е само еден знак прашалник. Дополнителна конфузија создава фактот што, иако официјално е наведено дека трае 1.234.567 часа, при репродукција видеото покажува само 12 часа.

Секако, интернетот го направи она што најдобро знае – почна да создава теории. Се појавија гласини дека каналот има врска со Северна Кореја, што ја разгоре имагинацијата и поттикна лавина на шпекулации за скриени пораки, експерименти со алгоритми или некоја идна „интернет легенда“.