Припадници на Службата за сузбивање на криминалот и службата за борба против тероризмот на српската полиција, попладнево по наредба на Вишото јавно обвинителство во Нови Сад, уапсија шестмина граѓани, поради сомнение дека подготвувале дела против уставниот поредок и безбедноста на Србија, во врска со кривично дело насилно прекршување на уставниот поредок, објави „Н1“.

Уапсени се: Љ.Д.(24), член на студентска организација „Став“, М.Ц.(26), член на Движењето на слободни граѓани, Д.С.(25), член на Движењето на слободни граѓани, М. (27), член на Движењето на слободни граѓани, како и двајца повозрасни луѓе, на 44 и 50-годишна возраст, исто така членови на Движењето.

Полицијата објави снимка од апсењето на активистите.

На снимката што ја пренесоа некои медиуми синоќа, се слуша како група луѓе разговараат за можни упади во Собранието на Србија и Радио телевизија на Србија. ПСГ се огради од снимката, но забележа и дека луѓето биле незаконски прислушувани и дека тоа бил приватен разговор, а не организирање на насилни протести.