Милан се оддалечи од трката за титулата во Италија, сега веќе заостанува 12 бодови зад водечкиот Наполи кој има и еден натпревар помалку.

Веќе четири мечеви по ред „росонерите“ не знаат за победа во Серија А, денеска изненадувачки ги разочараа своите навивачи со висок пораз од 2:5 против Сасуоло. Девет примени голови за два меча, ако се земе и поразот минатото коло од Лацио (4:0).

Гостите постигнаа два гола за 120 секунди преку Дефрел и Фратеси, па намали Жиру по асистенцијата на Калабриа.

Берарди исто така се запиша во листата на стрелците за 1:3 по 30 минути игра, а на стартот од вториот дел веќе беше 1:4 кога од пенал прецизно стрелаше Лауриенте.

„Петардата“ ја комплетираше Матеус Хенрике во 79 минута, а конечниот епилог го постави Орижи (81`).

Милан е на четвртото место со 38 бодови, колку што има и Аталанта на третата позиција, а два помалку од второпласираниот Интер. Сасуоло кој по подолг период им се врати на победите и чија цел е опстанок во елитата, се наоѓа на 16 место со 20 бодови колку и Лече на 15 позиција.