Завршија натпреварите од последното шесто коло во групата „Б“ од која Арсенал и ПСВ Ајндховен изборија пласман во нокаут-фазата од фудбалската Лига на шампионите.

Ленс како третопласиран ќе продолжи во Лига Европа, додека Севиља го заврши меѓународниот настап за оваа сезона.

Ленс во директна пресметка на домашен терен со 2:1 ја совлада Севиља, Франковски од пенал донесе предност за Французите во 63 минута, потоа од белата точка Шпанците израмнија во 79 минута преку Рамос. Конечниот епилог беше поставен во самиот финиш од средбата (90+6`) кога голем триумф за Ленс обезбеди Фулжени.

ПСВ и Арсенал одиграа 1:1, „топчиите“ водеа од 42 минута кога стрелаше Нкетиа, а Холанѓаните спречија пораз на стартот од второто полувреме (50`) благодарение на погодокот на Вертесен.

На конечната табела во групата Арсенал го освои првото место со 13 бодови, пред ПСВ (девет), Ленс (осум) и Севиља (два).