Членот на ловечкото друштво „Еко Фазан“, Љутфи Османи, објави ретка снимка од рис, кој е „фатен“ во шума во Кичевско преку ден, на дрво и во прекрасна позадина од есенски бои.

„Магична средба со балканскиот рис меѓу боите на есента. Снимено од Љутфи Османи, член на здружението „Еко Фазан“. Присуството на овој редок предатор го докажува природното богатство и дисциплината на нашето здружение“, се вели во соопштението на здружението „Еко Фазан“, кое ја објави фотографијата.

Балканскиот рис, кој е ендемски подвид на евроазискиот рис, со децении е критично загрозен во Македонија и во регионот. Се претпоставува дека на Балканот живеат уште само 40-50 единки. Главните опасности за опстанокот им се: загубата и фрагментацијата на природната средина, како и нелегалниот лов на рисот и неговиот плен, со што се намалува достапноста на храна.