Фудбалерите на Реал Мадрид славеа со 3-2 во 34. коло од шпанската Ла Лига против Селта Виго и ги задржаа шансите за освојување на шампионската титула. Четири кола пред крајот, „кралевите“ имаат четири бода помалку од лидерот Барселона, а следниот викенд ги очекува „Ел Класико“. Победа на „Камп Ноу“ е единствениот пат за Реал да остане во трката за трофејот.

Иако натпреварот започна идеално за мадридскиот гигант, заврши далеку понеизвесно од очекуваното. Арда Ѓулер го отвори резултатот во 33. минута, а само шест минути подоцна Килијан Мбапе постигна вистински еврогол по брза контра и зголеми на 2-0. Со тој резултат се замина на полувреме.

На самиот почеток на второто полувреме, повторно Мбапе се запиша и вторпат во листата на стрелците и со третиот гол за Реал ја потврди доминацијата на домаќините во тој период.

Но, Селта одби да се предаде. Хавиер Родригез го намали резултатот, а потоа и Вилиот Сведберг ја врати неизвесноста во натпреварот. Реал во завршницата мораше да се брани за да ги задржи трите бода и на крајот успеа да избегне реми.

Со оваа победа, Реал останува во трката за титулата, но сега сè зависи од „Ел Класико“. За да останат во игра, на Мадриѓаните им е потребна победа против Барселона, а потоа ќе мора да се надеваат и на нов кикс на каталонскиот тим во преостанатите три кола.