Американскиот рапер Офсет, со вистинско име Кијари Кендрел Сефус, се врати на настапите само шест дена откако беше ранет во пукање на Флорида, пренесува „Пипл“.

Инцидентот се случил пред хотелот и казиното „Семинол Хард Рок“, а раперот по укажаната помош и краткиот престој во болница сепак продолжил со планираните обврски.

Само неколку часа по отпуштањето од болница, Офсет настапи на студентскиот фестивал Роуфест на Универзитетот во Арканзас. На сцената пристигна во инвалидска количка, но набрзо стана и остатокот од настапот го изведе стоејќи пред публиката.

На концертот ги изведе своите познати хитови, вклучувајќи ја и песната „Bad and Boujee“ од периодот кога беше член на групата „Мигос“.

Ден по настапот сподели видеа и фотографии на социјалните мрежи, заблагодарувајќи се и нагласувајќи дека се чувствува добро, но и дека е фокусиран на закрепнувањето и семејството.

„Вистинска љубов. Бог е добар. Ви благодарам на сите“, напиша раперот во објавите.

Во претходна порака по излегувањето од болница тој порача: „Ви благодарам на сите кои ми испративте пораки и ми дадовте поддршка. Добро сум, но сакам да бидам уште подобар. Фокусиран сум на семејството, закрепнувањето и музиката. Свесен сум дека животот е полн со подеми и падови, но продолжувам понатаму“.

Додаде и дека приоритет му се закрепнувањето и семејството, како и враќањето на музичката кариера.

Според наводите на полицијата, во врска со пукањето бил приведен и раперот Лил Тџеј, кој подоцна негираше каква било вмешаност во инцидентот. Истрагата за случајот сè уште трае.