Поранешниот тренер на ФК Шкупи, а актуелен на Раднички Крагујевац, Младен Жижовиќ, ненадејно почина на 44-годишна возраст за време на натпревар од српското првенство против Младост од Лучани.

Трагедијата се случила на средината од првото полувреме, кога на Жижовиќ наеднаш му се слошило и паднал покрај клупата. Медицинскиот тим веднаш реагирал и го пренел во болница, но, и покрај сите напори, тренерот не успеал да преживее. Веста за смртта на тренерот пристигнала кон крајот на полувремето, по што судијата веднаш го прекинал натпреварот, кој се пренесуваше во живо на телевизијата „Арена Спорт“.

Шокираните фудбалери на двете екипи беа во солзи поради трагичната вест.

🇷🇸 | El entrenador del Radnicki 1923, Mladen Žižović, falleció a los 44 años tras desvanecerse durante un partido ante el Mladost Lucani en la Superliga de Serbia. Fue trasladado al hospital, pero no pudieron reanimarlo. pic.twitter.com/Tqomnsju9K

— Mundo en Conflicto 🌎 (@MundoEConflicto) November 3, 2025

Жижовиќ, кој е од Босна и Херцеговина, дојде во Скопје во септември 2023 година и ја водеше екипата на Шкупи една сезона, по што седна на клупата на Борац Бања Лука, со кој го оствари еден од најголемите успеси во историјата на клубот – пласман во Конференциската лига.

Во текот на оваа година го напушти Борац и пред само десетина дена беше именуван за тренер на Раднички Крагујевац, каде ова му беше само вториот натпревар на клупата.

Во својата кариера Жижовиќ беше тренер и на Слобода Тузла, Зрински Мостар и Радник Бијељина. Тој има и четири настапи за репрезентацијата на Босна и Херцеговина.