Поранешниот натпреварувач во музичкото шоу „Американски идол“, Кејлеб Флин, е уапсен во сојузната држава Охајо под сомнение за убиство на својата сопруга Ешли Флин, пренесува „Дедлајн“.

Триесет и деветгодишниот Флин од Тип Сити е приведен и обвинет пред Општинскиот суд во округот Мајами за убиство, како и за по две точки за тешко нападение и прикривање докази. Тој се изјаснил за невин на првото појавување пред судија, кое било одржано преку видеоврска од затворот во округот Мајами. Кауцијата му е одредена на два милиони долари, а следното рочиште е закажано за 26 февруари.

„Само сакам да се грижам за моите ќерки. Не сум ризик“, изјавил Флин пред судијата.

Според полициското соопштение, 37-годишната Ешли Флин била застрелана со пиштол од девет милиметри. Околу 2.30 часот по полноќ во понеделникот, Кејлеб Флин се јавил на бројот за итни случаи 911 и пријавил дека неговата сопруга крвари и не реагира, тврдејќи дека можно е натрапник сè уште да се наоѓа во куќата.

Сепак, истражителите подоцна соопштиле дека местото на настанот, кое вклучувало и знаци на насилно влегување, изгледало „исценирано“. Во моментот на инцидентот, нивните две малолетни ќерки спиеле во домот и не биле повредени.

Началникот на полицијата во Тип Сити, Грег Адкинс, изјавил дека семејството и заедницата заслужуваат темелна и професионална истрага. „Како резултат на истрагата, постоеше основано сомнение да се поднесе обвинение против Кејлеб Флин за убиство на неговата сопруга“, посочил тој, додавајќи дека поради тековната постапка нема да се изнесуваат дополнителни детали.

Ешли Флин била тренерка по одбојка за девојчиња во средно училиште и замена-наставничка во локалните училишта во Тип Сити, околу 30 километри северно од Дејтон. Според неговиот профил на Линкдин, Кејлеб Флин работел како потпретседател за продажба во компанија за комерцијални подни облоги.

Во интервју од 2013 година за „Американски идол“, Флин изјавил дека „музиката е сè што знае“ и дека токму сопругата го охрабрила да се пријави на натпреварот.

„Апсолутно го сакам Господ, а сопругата ја сакам повеќе од сè. Таа е многу, многу убава. Јас сум само обичен човек што обожава да пее“, рекол тогаш.

Неговиот адвокат изјавил дека ја доведува во прашање темелноста на истрагата и висината на кауцијата, посочувајќи дека таа му оневозможува да присуствува на погребот на сопругата.

Случајот и понатаму е во тек, а истрагата продолжува.