На планината Височица во Босна и Херцеговина вчера вечерта и во текот на ноќта се одвиваше исклучително тешка и напорна спасувачка акција за извлекување на телото на загинат планинар, како и за евакуација на неговиот пријател кој ја преживеа несреќата, објави босански „Аваз“.

Во акцијата учествуваа вкупно 20 спасувачи од Горската служба за спасување (ГСС) „Прењ“, ГСС „Јабланица“ и ГСС „Кантонот Сараево“.

Од Горската служба за спасување „Прењ“ информираа дека несреќата се случила во неделата кога Оперативниот центар на Полициската управа „Коњиц“ ги известил дека на локалитетот Поткрај, во кањонот на реката Ракитница, човек смртно настрадал откако паднал во провалија.

Со него бил и неговиот пријател, кој се спуштил до местото на несреќата, но поради исклучително тешкиот терен и исцрпеноста не можел самостојно да се врати, поради што било неопходно и негово спасување.

Драма во Словенија: Тројца хрватски планинари се затрупани од лавина

На терен веднаш била упатена петчлена екипа на која ѝ се приклучиле уште пет спасувачи од ГСС „Јабланица“. Подоцна, по понуда за помош од спасувачите на „Кантонот Сараево“, во акцијата се вклучиле уште 10 спасувачи. Заедно тие се искачиле до гребенот, на местото од каде што настраданиот паднал.

Оттаму наведуваат дека бил направен обид да се обезбеди хеликоптерска поддршка од ЕУФОР преку надлежните државни институции, но и покрај тоа што два хеликоптера ја надлетувале областа, согласност за нивно ангажирање не била добиена. Наместо воздушна поддршка, спасувачите се соочиле со административни пречки и, како што велат, немоќ на системот.

Поради тоа била донесена тешка, но единствено возможна одлука – телото на загинатиот да се транспортира рачно. Спасувачката операција траела повеќе часови, при што шест часа бил потребен исклучително тежок транспорт од кањонот на Ракитница до врвот на гребенот, а потоа и спуштање на другата страна. Во текот на акцијата биле совладани околу 600 метри висинска разлика и изведени повеќе тимски потези.

Во најкритичните моменти, кога спасувачите биле на работ на физичка исцрпеност, „Кантонот Сараево“ повикал дополнителни 15 спасувачи, кои пристигнале како неопходна поддршка и помогнале акцијата безбедно да биде завршена.

ВИДЕО | Ужас во Кина: Планинар се одврзал од безбедносното јаже за да направи селфи и загинал, снимен моментот како паѓа

По завршувањето на операцијата, телото на загинатиот планинар било предадено на службениците на Полициската управа „Коњиц“, по што бил извршен и службен брифинг. Сите спасувачи безбедно го напуштиле теренот и се вратиле во своите домови доцна по полноќ.

Од ГСС „Прењ“ истакнаа дека, иако државните механизми повторно затаиле, солидарноста, хуманоста и пожртвуваноста на спасувачите покажале дека човечноста и професионалноста на теренот не откажуваат.