ВИДЕО: Никола Јокиќ со рекорд на сезоната блескаше против Вашингтон визардс
Кошаркарите на Денвер синоќа во НБА лигата го победија тимот на Вашингтон со 113:104 со уште една одлична партија на српскиот центар Никола Јокиќ.
Јокиќ со 42 поени, 12 скокови и осум асистенции го предводеше актуелниот шампион до 30 победа сезонава. Реализираше 15 од 20 обиди од игра, 12 од 14 од слободните фрлања, а запиша и три блокади.
Кога Јокиќ ги постигна последните слободни фрлања на натпреварот, навивачите на Вашингтон кои останаа во салата почнаа да скандираат „МВП, МВП“.
– Тоа е уникатно. Тоа не се случува многу често и мислам дека само така го препознаваат тоа што го направил – еве еден човек кој беше два пати МВП на лигата и кој на тимот му го донесе првиот шампионски прстен, а исто така беше и МВП во финалето рече тренерот на Нагетс, Мајкл Мелоун.
Јокиќ најдобро го следеа Џамал Мареј и Мајкл Портер со по 19 поени, а Арон Гордон додаде 11 поени и 10 скокови. Во тимот на Вашингтон, кој го претрпе четвртиот пораз во низа, најдобар играч беше Кајл Кузма со 17 поени, додека Тајус Џонс имаше 15 поени и 13 асистенции.
НБА лига, резултати –
Орландо – Мајами 105:87
Вашингтон – Денвер 104:113
Хјустон – Бостон 107:116
Феникс – Индијана 117:110
ЛА Лејкерс – Портланд 134:110