Научниците открија нов вид риба во водите на Тасманија, чии предни две перки се претворија во „раце“. Необичната розова риба е од семејството Brachionichthys. Рибата никој не ја видел од 1999 година, а со предните перки „шета“ во плитките води.

На биолозите им требаа десет години да потврдат дека станува збор за нов вид. Тоа го потврдиле врз основа на бројни фактори (боја, број на пршлени, перки, мерења на телото…). Научниците веруваат дека пред 50 милиони години вакви риби ги имало многу повеќе. Денеска се класифицирани како загрозени, пишува Би-Би-Си.

Истражувач: Ова е возбудливо откритие

„Ова е возбудливо откритие и нуди надеж за континуиран опстанок на видот, бидејќи очигледно има пошироко живеалиште и дистрибуција отколку што се мислеше“, рече водечкиот истражувач и морски биолог Невил Барет.

Ешли Бастијансен од универзитетскиот Институт за Антарктикот и морски студи изјави дека вакво нешто не видела досега.

„Ги гледав нашите кадри и видов како малата риба скокна на гребенот што изгледаше малку чудно. Погледнав поблиску и можев да ги видам нејзините мали раце“, рече Бастијансен.