Сопругата на Влатко Лозаноски – Лозано, Сава Грачанин, објави преслатко видео од нивниот син во кое го спомена и својот сопруг.

Малиот Марко, кој се роди на 18 октомври 2024 година, на видеото пее, а гордата мајка до него напишала: „Пробите за концертот се до касно навечер. Се гледаме кај тато на концерт в сабота“.

Лозано ќе одржи концерт на 7 март во Арената „Борис Трајковски“, а сопругата ова видео го објави како поддршка пред големиот настан.

„Со големо задоволство ви ги претставувам моите специјални и музички гости и пријатели кои ќе бидат дел од мојот концерт во сабота на 7 март.

Прекрасната Александра Јанева, мојот драг пријател Никола Перевски – Пере од групата „Нокаут“, но имаме и специјален гостин кој ќе биде изненадување за вечерта. Повторно и на овој концерт ќе ни гостуваат сјајните Александра Илиева на саксафон и Бока Конга на перкусии, а за првпат ќе ни се придружи и одличниот Виктор Ангелов на виолина“, најави Лозано на социјалните мрежи.

„Татковството е најодговорната, но и најубавата улога што сум ја имал досега. Те менува од корен, те учи на трпение, на безусловна љубов и на тоа да ги гледаш работите од поинаква перспектива. Секој ден е ново учење и, искрено, уживам во секој момент, без разлика дали е лесен или предизвикувачки. Се трудам да бидам присутен и вистински вклучен, затоа што верувам дека времето и вниманието се најголемиот подарок што можеш да му го дадеш на своето дете. Семејството ми е темел и сила и токму од таму црпам инспирација и рамнотежа во сè што правам“, рече Лозано во едно интервју за „Слободен печат“.

Лозано пред концертот на 7 март: Сите ќе си заминат со полни срца!