Големата доминација на противникот во скок-играта (24:38), како и неговата одлична шутерска вечер беа главните причина за поразот на МЗТ Скопје Аеродром во вечерашната пресметка на домашен терен против Морнар (77:94) во СЦ „Јане Сандански“ во својот шести натпревар во АБА лигата.

„Сино-белите“ одиграа одлично во првото полувреме, во кое најчесто бевме во водство, на моменти и со осум поени разлика (32:24), но ваквиот ритам не го одржаа и во продолжението. Црногорскиот тим заигра побрзо, нивните најдобри кошаркари, Расел и Михаиловиќ погодуваа во серија, што веќе во третата четвртина им донесе резултатски пресврт..

Гостите со серија 14:0 првпат дојдоа до двоцифрена предност, која потоа ја одржаа до крајот. Играчите на Александар Петровиќ се трудеа, пробуваа да се вратат во игра, но не дојдоа до посакуваната цел.

Крстевски со 22 поени беше најефикасен во МЗТ, а двоцифрен ефект имаа уште и Кефи со 14 поени и В. Стојановски со 13 поени. Михаиловиќ со 25 и Расел со 22 беа најпрецизни кај Морнар.

Следува еднонеделна пауза поради настапите на репрезентацијата на Македонија, додека следна јадранска обврска на „металците“ е гостувањето кај ФМП на 18 ноември во Белград, Србија.