Ретка џиновска медуза, која може да порасне до должина на еден училишен автобус, беше снимена за време на научна експедиција во Аргентина, пренесуваат странските медиуми.

Медузата „стигиомедуза гигантеа“ (stygiomedusa gigantea), позната и како џиновска фантомска медуза, беше снимена на длабочина од 250 метри под површината. Ѕвончестата медуза може да порасне до еден метар во дијаметар, додека нејзините четири краци можат да достигнат должина до 10 метри. Млади примероци риби беа видени како пливаат околу медузата.

Иако оваа медуза нема отровни пипала, таа ги користи своите краци за да лови плен, вклучувајќи планктони и мали риби. Снимката беше направена од истражувачи од Океанскиот институт „Шмит“, кои го следат биодиверзитетот долж аргентинскиот континентален гребен.

Тимот патуваше по целиот брег, од Буенос Аирес до областа во близина на Огнената Земја, вкупно растојание од околу 3.000 километри. За време на експедицијата, истражувачите го документираа најголемиот познат корален гребен во светските океани, откривајќи 28 потенцијално нови видови, вклучувајќи црви, корали, морски ежови, морски полжави и морски анемони.

– Не очекувавме вакво ниво на биодиверзитет во аргентинската длабока морска област и беше неверојатно да се види како врие од живот – рекол водечкиот научник на експедицијата, Марија Емилија Браво од Универзитетот во Буенос Аирес.

– Набљудувањето на функциите на екосистемот и врските меѓу видовите беше извонредно. Отворивме „прозорец“ кон биодиверзитетот на нашата земја, но јасно е дека сè уште има многу за истражување – додала Браво.

Коралниот гребен е со големина на Ватикан и претставува засолниште за многу организми, вклучувајќи риби, ракови и октоподи. Гребенот се протега по југозападниот Атлантски Океан, а најголемите делови се наоѓаат во аргентинските води.

Иако претходно малку се знаеше за областа, експедицијата го откри нејзиниот огромен обем. На пример, тимот пронајде корални гребени 600 километри јужно од претходно познатите, на 43,5 степени јужна географска ширина.