Мишел и Барак Обама требало да се сретнат со режисерот Роб Рајнер и неговата сопруга Мишел вечерта кога биле пронајдени мртви во нивниот дом во Лос Анџелес.

„Требаше да се видиме таа вечер, синоќа, и ја добивме веста“, рекла Мишел Обама во понеделникот во емисијата „Џими Кимел во живо!“, кога водителот ја прашал како се справува со веста за убиството на нејзините пријатели.

Поранешната прва дама на САД открила дека таа и нејзиниот сопруг Барак Обама биле скршени кога дознале дека легендарниот режисер и неговата сопруга, со кои биле пријатели „многу, многу години“, биле убиени.

„Дозволете ми да го кажам следново: За разлика од некои луѓе, Роб и Мишел Рајнер се едни од најпристојните, најхрабрите луѓе што некогаш би сакале да ги запознаете“, изјавила Мишел, алудирајќи на постхумната објава на претседателот Трамп на социјалните мрежи во која го нарече Рајнер „пореметен“.

„Тие не се пореметени ниту луди. Она што отсекогаш биле се страстни луѓе кои, во времето кога нема многу храброст, беа тип на луѓе кои беа подготвени да ги стават своите постапки зад она за што се грижат. А се грижеа за своето семејство. И се грижеа за оваа земја. И се грижеа за правдата и еднаквоста. И тоа е вистината. Јас ги познавам“, додала таа.

По смртта на двојката, се огласи и поранешниот американски претседател Обама.

„Мишел и јас сме скршени од трагичната смрт на Роб Рајнер и неговата сакана сопруга Мишел. Достигнувањата на Роб во филмот и телевизијата ни дадоа некои од нашите омилени приказни на екранот“, напишал тој на Икс.

„Но, под сите приказни што ги создаде стоеше длабоко верување во добрината на луѓето и доживотна посветеност на спроведување на тоа верување во дело. Тој и неговата сопруга живееја живот дефиниран со цел. Ќе бидат запаметени по вредностите што ги застапуваа и безбројните луѓе што ги инспирираа. Изразуваме најдлабоко сочувство до сите што ги сакаа.“

Режисерот Роб Рајнер и неговата сопруга пронајдени мртви, полицијата истражува двојно убиство

Синот на Роб Рајнер имал историја на насилство: Го уништил домот на своите родители додека бил дрогиран