Несекојдневна глетка е забележана на Езерото Полифито во северна Грција, кога една мечка го преплива целото езеро не обрнувајќи внимание на луѓето во чамци во непосредна близина, пренесе „Прототема“.

Мечката го почнала пливачкиот „маратон“ од местото Кранидија и била следена и снимана како плива час и половина. Таа вкупно поминала растојание од приближно 20 километри до Кесарија, во областа Кожани на северозападот на земјата. Според очевидците кои ја снимале, мечката со часови пливала без престан, не покажувајќи знаци на замор.

„Бев загрижен дали ќе успее да стигне до копното, но истовремено се плашев и да не му се приближи на мојот чамец“, вели рибарот кој ја сними за локалните медиуми.

Откако успешно го завршила своето „патување“, мечката излегла на брегот и исчезнала во шумата.

Кафеавите мечки се познати како исклучително добри и издржливи пливачи, способни да поминат големи растојанија во потрага по храна или нова територија.