ВИДЕО: Кулибали е херојот на Сенегал, Холандија го освои првото место во групата „А“
Холандија не дозволи никакво изненадување, ја запиша и втората победа на Светското првенство во Катар, откако го совлада домаќинот со 2:0.
„Лалињата“ стигнаа до триумфот на головите на Гакпо во 26 минута по асистенцијата на Клаасен, и де Јонг во 49 минута.
Играчите на Луј ван Гал го освоија првото место во групата „А“ со седум бодови, пред Сенегал кој во директниот меч за втората позиција славеше против Еквадор со 2:1.
Сенегалците во 44 минута стекнаа предност со погодокот на Сар кој беше прецизен од белата точка.
Израмнија Еквадорците во 68 минута преку Каиседо, асистент беше Торес, но нивната радост траеше само 120 секунди. Избраниците на селекторот Алиу Сисе дојдоа до уште еден погодок, благодарение на играчот на Челси, Кулибали.
Во осминафиналето на Мундијалот, Холандија ќе игра со второпласираниот, а Сенегал со првопласираниот од групата „Б“ каде што моментно табелата изгледа вака: Англија 4 бодови, Иран 3, САД 2 и Велс 1.