Американскиот пејач Крис Браун повторно се најде во сериозен судски процес, откако беше обвинет за наводен брутален физички напад во еден од најексклузивните ноќни клубови во Лондон. И покрај тежината на обвиненијата, судот му дозволи да се врати во Соединетите Американски Држави, но под строги услови и со исклучително висока кауција, пренесува „Скај њуз“.

Браун се појави пред судот Саутварк Краун (Southwark Crown) во Лондон, каде што уште еднаш ги негираше сите обвиненија. Тој изјави дека не е виновен за нанесување тешки телесни повреди, како и дека не носел оружје на јавно место. Истовремено, ја отфрли и посериозната точка од обвинението која се однесува на обид за нанесување тешки телесни повреди.

Според обвинителството, инцидентот се случил на 19 февруари 2023 година во ноќниот клуб „Tape“, сместен на плоштадот Хановер во центарот на Лондон. Наводно, Браун повеќепати го удрил музичкиот продуцент Абрахам Диав со шише текила по главата. Истрагата тврди дека снимките од безбедносните камери прикажуваат како пејачот го брка продуцентот и го напаѓа со раце и нозе.

Пејачот беше уапсен во мај, откако со приватен авион слета во Салфорд, со што случајот доби и меѓународна димензија.

Судот му одобри кауција, но под исклучително строги услови. Меѓу нив се уплата на 6,7 милиони долари, предавање на патната исправа и целосна забрана за контакт со наводните жртви, вклучувајќи го и Диав. Дополнително, му е забрането да го посетува клубот каде што се случил инцидентот. Секое прекршување на условите би значело губење на платената кауција.

Случајот дополнително ја отвори темата за бурното минато на Крис Браун, кој зад себе има долг список на насилни инциденти. Најпознат е случајот од 2009 година, кога физички ја нападна тогашната девојка, пејачката Ријана, непосредно пред доделувањето на Греми наградите. Таа заврши во болница со сериозни повреди на лицето, а Браун подоцна ја призна вината и доби условна казна, општествено корисна работа и задолжителна терапија за семејно насилство.

По тој настан, неговата кариера беше обележана со низа инциденти, тепачки и истраги во повеќе американски градови, меѓу кои Њујорк, Вашингтон и Лос Анџелес. Повеќепати престојувал на рехабилитација поради проблеми со бесот и менталното здравје, а во 2014 година заврши и во затвор поради кршење на условната казна, иако беше пуштен предвреме. Медицинските извештаи од тој период спомнуваат биполарно нарушување, посттрауматски стрес и други психички тешкотии.

И по истекот на условната казна, Браун продолжи да се соочува со нови обвиненија за насилство и сексуално злоставување. Дел од тие случаи беа отфрлени поради недостаток на докази, додека други завршија со вонсудски спогодби.