На Фејсбук страната Село Бродец се појави снимка на која се гледа како мечка го бара своето мече во брзите води на реката Пена.

Локацијата е на само стотина метри од шарпланинското село Бродец, по течението на Пена. Мечката најпрвин во потрага по мечето ја преминува реката од едната, а потоа и од другата страна. За околу една минута се појавува мечето, носено од брзата вода, а мечката скока по него во обид да го спаси. Реката ги носи по надолу по течението, но од густата шума не може да се види каков е исходот. Во меѓувреме, додека трае оваа „спасувачка мисија“ се појавува уште едно мече долж реката кое ја следи случката, а постојано се слуша и завивање.

Жители на Бродец ни посведочија дека мечката со мали мечиња постојано го „посетува селото“ и се доближува на десетина метри до првите куќи, најверојатно во потрага по храна.