Германскиот министер за одбрана Борис Писториус сака да ја спречи крајно десничарската партија Алтернатива за Германија (АФД) да добие пристап до класифицирани информации доколку влезе во владата. Писториус ги наведе блиските врски на партијата со Русија како причина. Во неделното издание на весникот  „Билд“, како што пренесува Индекс.хр. тој истакнал дека блискоста на партијата со рускиот претседател Владимир Путин е неоспорна.

Чувствителните информации не смеат да паднат во погрешни раце, рече Писториус. „Интензивно го разгледуваме прашањето кого можеме да овластиме да има пристап до класифицирани информации. Веќе го правиме тоа. Мораме да го сториме тоа затоа што се однесува на безбедноста на нашата земја.“

ВИДЕО | 20.000 луѓе во Германија излегоа на протест против ултрадесничарската АфД — партијата пак ги избра Вајдел и Хрупала за лидери

АФД, најголемата опозициска партија во Германија, е под истрага на домашните разузнавачки служби во некои покраини поради нејзините екстремистички антиимигрантски ставови. Сите големи партии во Германија одбиваат да соработуваат со АФД во политика позната како „заштитен ѕид“.

АФД се надева дека ќе освои апсолутно мнозинство на регионалните избори во септември во сојузните покраини Саксонија-Анхалт и Мекленбург-Западна Померанија, што би можело да ѝ овозможи за првпат да управува со германска покраина.