Италија го купи ремек-делото „Ете го човекот“ (Ece Homo) од италијанскиот сликар Антонело да Месина за неверојатни 14,9 милиони долари, што аукциската куќа „Сотбис“ му ја понуди на највисокиот понудувач минатата недела.

Малата слика, наменета за „приватно поклонение“ и насликана од двете страни, со приказ на „Ете го човекот“ од едната страна и Свети Јероним од другата страна, ја купи Министерство за култура на Италија преку Генералниот директорат за музеи, објавува „РАИ њуз“.

Според неофицијални информации, сликата требало да биде понудена на аукција со проценета вредност од 10 до 15 милиони долари, но италијанската држава ја купила пред почетокот на лицитацијата.

Фондацијата „Зери“ истакнува дека станува збор за мала слика на дрвена основа и едно од ретките дела што со сигурност може да се припишат на Антонело да Месина.

Делото е двострано, со прикази на „Ecce Homo“ и Свети Јероним Покајникот во пустината, а токму локалниот италијански историчар Федерико Зери во 1985 година прв му ја припишал сликата на Антонело да Месина, опишувајќи ја како „рано дело непознато за уметничката литература“.

Делата на Антонело да Месина се исклучително ретки и само околу 40 негови слики се зачувани до ден-денес.

Ова дело, создадено околу 1460 година по враќањето на уметникот во неговата родна Месина, се смета за последно во приватна колекција. Сликата е наменета за длабоко размислување и духовно искуство на сопственикот.

Од едната страна, Исус Христос излегува од темнината зад парапетот, со црвени и отечени очи, додека капки крв од трновиот венец му паѓаат по челото и градите, а од другата страна, Свети Јероним Покајникот е прикажан во суров пустински пејзаж, обележан со страдање и посветеност на Христос.

Првата документирана трага од сликата датира од почетокот на 20 век, кога била во приватна шпанска колекција.

Делото го купила галеријата „Вилденштајн“ од Њујорк во 1967 година, а потоа било продадено преку „Сотбис“ на галеристот Фабрицио Морети, кој подоцна му го продал на сегашниот сопственик.