Младиот кошаркар на Оклахома сити тандер, Никола Топиќ, испрати силна и охрабрувачка порака откако за првпат оваа сезона се појави на паркетот иако сè уште е во процес на лекување од рак на тестисите.

Топиќ ја пропушти целата своја дебитантска НБА сезона 2024/25 откако претрпе делумно кинење на предниот вкрстен лигамент на левото колено. По долгиот процес на рехабилитација, српскиот плејмејкер успеа да одигра само еден претсезонски натпревар, но веднаш потоа следеше нов, уште потежок удар, дијагноза на тестикуларен карцином.

Генералниот менаџер на Тандер, Сем Прести, уште во октомври ја информираше јавноста за здравствената состојба на младиот кошаркар, откривајќи дека била извршена медицинска процедура со цел биопсија, по што лекарите потврдиле дека станува збор за рак на тестисите.

„Процедурата беше неопходна за да се изврши биопсија, а резултатите покажаа дека Никола се соочува со рак на тестисите. Тој има извонреден тим онколози, како од Универзитетот во Оклахома, така и од клиниката МД Андерсон, и сите тие се исклучително позитивни во врска со неговата прогноза. Важно е да се истакне дека ова е најизлечивиот облик на рак кај мажите“, изјави Прести.

Првиот човек на кошаркарските операции во Оклахома додаде дека лекарите препорачале хемотерапија како најсоодветен третман во моментов, а Топиќ сакал информацијата да стане јавна дури откако официјално ќе започне со терапијата.

Иако е официјално надвор од терените и за сезоната 2025/26, Топиќ не се оддалечи од тимот. Напротив, тој редовно е присутен во салата, патува со екипата и е дел од секојдневието на Тандер, покажувајќи силен карактер и посветеност и во вакви моменти од кариерата.

Nikola Topic out here in pregame warmups. First time I’ve seen him since his testicular cancer diagnosis. Good to see him pic.twitter.com/rmSxun3abV

— Clemente Almanza (@CAlmanza1007) December 18, 2025

Пред натпреварот против Лос Анџелес Клиперс, новинарите за првпат сезонава го забележаа Топиќ како шутира и се загрева заедно со соиграчите на паркетот во „Пејком центарот“. Иако стануваше збор само за загревање, неговото присуство на теренот беше дочекано со оптимизам и се толкува како позитивен знак дека процесот на лекување оди во добра насока.

It’s honestly hard to put into words what Nikola Topic is doing right now.

To deal with an ACL recovery and then a cancer diagnosis all in your first year is a lot for anyone to handle. But seeing him back on the court just two months after starting chemo says everything about… pic.twitter.com/o476bSNqie

— ClutchPoints (@ClutchPoints) December 19, 2025

Никола Топиќ важеше за еден од најголемите таленти на својата генерација и пред повредата на коленото беше проектиран како сигурен избор во топ 5 на НБА драфтот. На крајот, Оклахома сити Тандер го избраа како 12-ти пик на драфтот во 2024 година, со јасна визија дека во иднина ќе биде еден од носителите на играта.