„Езерџиите“ доцна синоќа го совладаа Голден стејт со 103:100 во натпреварот за место во плеј-офот на Западната конференција во НБА лигата.

Леброн Џејмс постигна 22 поени, имаше 11 скокови и 10 асистенции, што е негов петти „трипл-дабл“ учинок во дресот на Лос Анџелес лејкерс сезонава.

На една минута до крајот на средбата „Кралот“ Џејмс постигна тројка со што го постави и конечниот резултат. Поефикасен беше само неговиот клупски колега Ентони Дејвис со 25 поени (12 скока).

За „воините“ доминираше Стеф Кари со 37 поени, додавајќи седум скока и три асистенции. Мечот можеше да отиде во продолжение, но Кент Бејзмор погреши во додавањето.

Лејкерси на тој начин се изборија за плеј-оф како седма екипа и ќе играат против второпласираниот Феникс санс.

Голден стејт ќе се соочи со Мемфис гризлис кој пак го победи Сан Антонио во вториот плеј-ин дуел за осмото место во плеј-офот кое донесува пресметка со првопласираната на Западот, Јута џез.

За Гризлис во синоќешниот триумф блескаше Дилон Брукс со 24 поени (седум скока), следен од Јонас Валанчиунас со 23 поени и 23 скокови. Кај Спарси по 20 поени имаа Демар ДеРозан и Руди Геј.