Се дознаа уште три екипи кои ќе играат во групната фаза од Лигата на шампионите, тие се Антверп (Белгија), Копенхаген (Данска) и ПСВ (Холандија). Истото, но во вторникот го направија Галатасарај (Турција), Брага (Португалија) и Јанг Бојс (Швајцарија).

Во групите на Лига Европа ќе продолжат Молде (Норвешка), Панатинаикос (Грција), Макаби Хаифа (Израел), АЕК Атина (Грција), Ракув (Полска) и Ренџерс (Шкотска).

Антверп и на реваншот од плеј-офот во ЛШ на гостински терен успеа да го совлада грчкиот АЕК овојпат со 2:1, а на првиот дуел беше 1:0.

Недоволно беше ремито на полскиот Ракув (1:1) на гостувањето кај Копенхаген. Данците слават по овој двомеч благодарение на победата од првиот натпревар со 1:0.

По нерешените 2:2 во првиот дуел во Шкотска, холандскиот ПСВ на возвратната пресметка во Ајндховен го декласираше Ренџерс (5:1).