Како што пренесува српскиот веб портал „Мондо“, без оглед дали со Борац Бања Лука ќе ја освои шампионската лига во Босна и Херцеговина, Веселин Вујовиќ ќе го напушти клубот и по третпат во кариерата ќе седне на клупата на Вардар 1961, двократниот европски шампион.

Од неколку различни извори за споменатиот извор е потврдено дека Вујовиќ сигурно ќе го напушти Борац, дури и доколку биде шампион со оваа екипа, нема да го продолжи петмесечниот договор кој го потпиша по доаѓањето.

Исто така, можно е во „пакет“ заедно со Вујо да дојде и младиот ракометар на Извиѓач, Милош Кос кој е дел од кадетската репрезентација на Србија и игра на позицијата среден бек.

Тренерот на тимот од Љубушки, Тони Чолина, демантираше дека Кос ќе го напушти тимот на крајот од сезоната, велејќи дека „првпат слуша за такво нешто“ и дека сигурно ќе знае дека тоа беше вистина. Но, „каде има чад, има и оган“, индиректно потврди Нешо Зовак, член на Надзорниот одбор во клубот од Љубушки, а можеби и ненамерно откри и други важни информации.

– Го обновивме договорот со Кос пред шест месеци, па сега важи 3+1 година, тоа е проект на клубот и рано е да се зборува за негово заминување. Но, искрено не верувам во тоа. Имаше повик од Вујо, контактираше со Кос, тие ми велат дека тој го презема Вардар, дека 99 проценти сè е договорено – рече Зовак и додаде дека малку „излетал“ со тие информации.

Останува само да се види дали ваквите шпекулации ќе станат реалност, дали од следната сезона Вујо повторно ќе го води Вардар 1961, и дали клубот ќе се освежи со ново засилување.

Можеме да додадеме уште дека Вујовиќ двапати ги водеше „црвено-црните“, првпат во периодот од 2006-09 година, а вториот пат од 2011 до 2013 година.