Ракометарите на Вардар со сигурна игра го отворија турнирот „Крсте Андоновски“ во Охрид, совладувајќи го српскиот претставник Динамо Панчево со 29-27.

Средбата започна во изедначено темпо, а Динамо во неколку наврати имаше минимално водство. Се играше гол за гол сè до резултатот 7-7, кога избраниците на новиот стратег Чупиќ го фатија ритамот и првпат поведоа со два гола разлика. Од тој момент Вардар ја презеде контролата и до крајот на натпреварот не дозволи резултатско израмнување.

На полувреме „црвено-црните“ заминаа со предност од 14-11, а во второто полувреме само го потврдија дека се подобар противник. Вардар доминираше во сите сегменти, разликата на моменти достигна и седум голови, па Динамо успеа само да го ублажи поразот во финишот.

Вардар и оваа година има амбиции за нов трофеј во Охрид, откако лани во финалето го совлада Алкалоид.