Ракометарите на Вардар 1961 славеа вечерва над германски Мелсунген во „Јане Сандански“ со 37-33 и освои важни бодови во битката за четвртфинале во ЕХФ Европската лига.

Гостите подобро го отворија натпреварот и во 13. минута поведоа со 10-4, а во неколку наврати имаа и плус шест. „Црвено-црните“ делуваа разнишано, но не дозволија резултатски бродолом, па до паузата се вратија во игра и намалија на минимални 18-19.

Во продолжението следуваше сосема поинаква слика. Тимот предводен од Иван Чупиќ заигра поцврсто во одбраната и потрпеливо во нападот. Долго време резултатот се движеше гол за гол, сè до 45. минута кога Вардар конечно фати ритам. При 28-27, скопјани врзаа три погодоци по ред и создадоа капитална предност од +4, која умешно ја сочуваа до последниот свиреж.

Во офанзивниот налет се истакнаа Јака Малус со десет и Вукашин Воркапиќ со девет погодоци, кои беа нерешлива енигма за германската одбрана.

Со оваа победа Вардар се израмни по бодови со Бенфика, а токму против португалскиот состав во следното коло ќе се води директната битка за место меѓу најдобрите осум. Скопјани ќе бркаат триумф од најмалку пет гола разлика за да го заверaт посакуваниот пласман во четвртфиналето.