Екипата на РК Вардар продолжи со сигурните настапи во Куп на Македонија во ракомет и обезбеди пласман на завршниот турнир, откако во финалето од групата А го совлада РК Пелистер 2 со 27:22.

Само неколку часа по победата над РК Бутел, „црвено-црните“ без поголеми проблеми ја завршија и втората задача. Вардарци одиграа контролирано и без преголем притисок успеаја да го скршат отпорот на противникот, обезбедувајќи место меѓу најдобрите на турнирот.

Најефикасен во победничкиот состав беше Урош Митровиќ со шест погодоци, додека по три гола запишаа Лазаревски, Атанасовски и Кавада. Кај битолскиот тим се издвои Славков, кој беше најефикасен на натпреварот со девет погодоци.

Покрај Вардар, пласман на завршниот турнир веќе обезбеди и РК Пелистер, додека се очекува таму да им се приклучат и екипите на РК Алкалоид и РК Охрид.