Американскиот актер Роберт Карадин почина на 23 февруари на 71-годишна возраст, а Канцеларијата на судскиот лекар во округот Лос Анџелес потврди дека неговата смрт е класифицирана како самоубиство, пренесува „Ролинг стоун“.

Како официјална причина се наведуваат последици од аноксично оштетување на мозокот предизвикано од бесење. Овој вид повреда настанува кога целосно се прекинува дотокот на кислород до мозокот, додека терминот „секвели“ се однесува на здравствени состојби што се јавуваат како последица од претходна повреда или болест.

Телото на актерот им е предадено на членовите на семејството, а медиумите претходно објавија дека починал во болница. Семејството соопшти дека Карадин си го одзел животот по речиси дваесетгодишна борба со биполарно нарушување.

„Со длабока тага ја споделуваме веста дека нашиот сакан татко, дедо, вујко и брат почина. Во свет што понекогаш знае да биде мрачен, Боби беше светлина за сите околу себе“, наведоа неговите најблиски, додавајќи дека храбро се борел со болеста.

Неговиот помлад брат, актерот Кит Карадин, изјави дека семејството одлучило јавно да зборува за причината за смртта со цел да се подигне свеста за менталното здравје и да се намали стигмата поврзана со психичките нарушувања. Биполарното нарушување му било дијагностицирано по смртта на нивниот брат Дејвид Карадин во 2009 година.

По веста се огласи и неговата ќерка Евер Карадин, која во емотивна објава напиша дека го изгубила својот „драг и духовит татко“, истакнувајќи дека секогаш ѝ бил најголема поддршка.

Семејството апелираше јавноста да ја почитува нивната приватност во периодот на жалост, со надеж дека неговата животна приказна ќе помогне во поголемо разбирање на важноста на грижата за менталното здравје.

По долгата борба со биполарно растројство, почина актерот Роберт Карадин