„Усје“: Обвинувањата против нас се невистинити, со правна постапка ќе ја докажеме вистината
Цементарница „Усје“ целосно ги отфрла неоснованите обвинувања, чија цел е дефокусирање на јавноста. Оттаму повторуваат дека при вонредната контрола од страна на Државниот инспекторат за животна средина, спроведена на 3. и 4. јануари 2023 година, во присуство на инспектори од Град Скопје, потврдено е дека емисиите од производниот процес се пониски од дозволените гранични вредности. Нагласуваат дека производниот процес се одвива во законски определените рамки и според еколошките стандарди, а производството автоматски запира доколку филтрите не работат.
Поради енергетската криза и нарушеното снабдување со природен гас, за загревање на просториите се употребуваше мазут што е дозволен енергенс согласно А-Интегрираната Еколошка Дозвола. При оваа вонредна контрола, кај парниот котел, кој не е дел од производниот процес и е исклучиво наменет за загревање на просториите, беше регистрирано отстапување кај еден параметар од мерењата. Оттука, неосновано е врз основа на еден параметар каде што беа утврдени повисоки вредности, да се носи заклучок дека компанијата е виновна за состојбите со загадувањето. Во тек е постапка со надлежната институција, во чии рамки ќе се разгледаат сите релевантни аспекти – се вели во соопштението од Цементарница „Усје“.
Оттаму додаваат дека компанијата веднаш ги имплементирала препораките на инспекторатот и направила замена на енергенсот со природен гас, а дека за разлика „Усје“, многу јавни објекти во градот продолжуваат да користат мазут за загревање, а јавноста не е информирана дали на овие објекти се вршат какви било мерења. Покрај тоа, како што велат, мерењата направени на 3. и 4. јануари 2023 во кругот на Цементарница, уште еднаш потврдуваат дека нема корелација помеѓу работата на Цементарницата и квалитетот на амбиентниот воздух во градот.
Со оглед на фактот, дека во јавноста се изнесуваат обвинувања и констатации кои не се поткрепени со факти или со научни докази, а во насока на заштита на вистината, ние ќе покренеме соодветна правна постапка пред надлежните органи – велат од Цементарница.