УШТЕ ЕДНО „НЕ“ ЗА ЏОНСОН: Одбиено барањето за ново гласање во паралментот за договорот за Брегзит
Претседателот на Долниот дом на британскиот парламент, Џон Берко, соопшти дека владата не може да бара од пратениците повторно да се гласа за договор за Брегзит.
Ова е уште еден удар за британскиот премиер Борис Џонсон, кој имаше за цел да ја извади земјата од ЕУ до крајот на месецот, констатира агенцијата АП.
Берко, образложувајќи ја одлуката, изјави дека гласањето кое владата го бара „во суштина е исто“ како и она кое веќе е одржано во саботата, па во тој случај само би се прекршиле правата на парламентот.
Поради тоа, како што рекол, не може да дозволи денеска повторно да се гласа.
Џонсон побара ново директно гласање за договорот за Брегзит, два дена откако пратениците се изјаснија за одложување на гласањето, со цел повторно да ја разгледат опцијата за изгласување на новиот договор.
Парламентарните правила генерално забрануваат иста мерка два пати да биде разгледувана на исто заседание.